Türkiyə Prezidenti ABŞ-ın müsəlman icmasının nümayəndələri ilə görüşüb
Türkiyə Prezidenti Rəcəb Tayyib Ərdoğan Birləşmiş Millətlər Təşkilatının (BMT) Baş Assambleyasının 76-cı sessiyasında iştirak etmək məqsədilə Amerika Birləşmiş Ştatlarında rəsmi səfərdədir. Prezidenti səfərdə ölkənin milli müdafiə naziri Hulusi Akar, ticarət naziri Mehmet Muş, mədəniyyət və turizm naziri Mehmet Nuri Ərsoy və Türkiyədə hakim Ədalət və İnkişaf Partiyası sədrinin müavini Binəli Yıldırım müşayiət edirlər.
AZƏRTAC xəbər verir ki, bazar günü Prezident Ərdoğan Manhettendə, BMT-nin mənzil-qərargahı ilə üzbəüz yerləşən “Türk evi”ndə olub. Bu binada Türkiyənin BMT yanında daimi nümayəndəliyi və Türkiyənin Nyu-Yorkdakı Baş konsulluğu yerləşəcək.
Manhettendə, Birinci avenyu, 821 ünvanda yerləşən bu binada 1977-ci ildən 2013-cü ilədək Türkiyənin BMT yanında daimi nümayəndəliyi və Türkiyənin Nyu-Yorkdakı Baş konsulluğu yerləşib. Hazırda həmin yerdə 35 mərtəbəli göydələn tikilib, binanın fasadı ənənəvi türk memarlığı üslubundadır.
Prezident Ərdoğan “Türk evi”ni ziyarət etdikdən sonra ABŞ-ın müsəlman icmasının, o cümlədən Nyu-Yorkun Azərbaycan diasporunun nümayəndələri ilə də görüşüb. Türkiyə-Amerika Milli Əlaqələndirmə Komitəsinin təşkil etdiyi qəbul Manhetten-Mərkəzdə mətbuat üçün qapalı keçib.
Türkiyə Prezidenti səfər çərçivəsində bir sıra ölkələrin liderləri ilə, həmçinin BMT-nin Baş katibi Antonio Quterreş ilə ikitərəfli görüşlər keçirəcək.


