Koşta: Serbiya üçün qapılar açıq qalır, islahatları sürətləndirmək lazımdır 

 

Avropa İttifaqının (Aİ) genişlənməsi geostrateji zərurətdir ki, bu Serbiyanın Aİ-yə daxil olmasına aiddir. 

Bu barədə Aİ Şurasının sədri Antonio Koşta Belqradda Serbiya Prezidenti Aleksandar Vuçiçlə birgə mətbuat konfransında bildirib. 

O qeyd edib ki, lakin Serbiyanın irəliləyiş sürəti ölkənin islahatlar aparmağa və blokun siyasəti ilə yaxınlaşmağa hazır olmasından asılı olacaq. 

A.Koşta Serbiyanın Avropa perspektivinə dəyişməz dəstəyini təsdiqləyib. O vurğulayıb ki, qoşulma prosesi etimada əsaslanır və konkret şərtlərin yerinə yetirilməsini tələb edir. 

Onun sözlərinə görə, Belqrad və Priştina arasında münasibətlərin normallaşdırılması, o cümlədən Oxrid sazişlərinin yerinə yetirilməsi, Serbiyanın xarici siyasətinin Aİ-nin mövqeyinə uyğunlaşdırılması, eləcə də daxili islahatların davam etdirilməsi əsas prioritetlər olaraq qalır. 

A.Koşta qanunun aliliyi, media azadlığı və seçki qanunvericiliyinin islahatı məsələlərinə xüsusi diqqət yetirib: "Biz bu vacib sahələrdə islahatları sürətləndirməyə davam etməyə çağırırıq". 

Aİ Şurasının sədri ötən həftə seçki sistemi ilə bağlı dörd qanunun qəbul edilməsini çox vacib addım adlandırıb. 

O həmçinin vurğulayıb ki, Aİ ticarət, investisiya və demokratik təsisatların dəstəklənməsi sahəsində Serbiyanın ən böyük tərəfdaşı olaraq qalır: "Biz daha çox şey etmək istəyirik və buna hazırıq. İrəliləyişin sürəti isə Serbiyanın öz qətiyyətindən asılıdır". 

Aİ Şurası rəhbərinin sözlərinə görə, qəti addımlar atmaq üçün fürsət pəncərəsi hazırda açıqdır.