Yunanıstan, Xorvatiya və Albaniya KİV-ləri Azərbaycanın Xalq Cümhuriyyəti barədə geniş materiallar yayıblar

28 May – Respublika Günü ilə əlaqədar Yunanıstanın geniş oxucu kütləsinə malik “cnn.gr”, “volospress.gr”, “thes.gr”, “teligrafimanews.gr”, “15minutes.gr”, “tokarfi.gr” və “enimerosi24.gr” xəbər portallarında, eyni zamanda Albaniyanın aparıcı internet xəbər səhifələrindən “albaniadailynews.al” və “argumentum.al”da “Azərbaycanda Respublika Gününün 103-cü ildönümü qeyd olunur” və “Azərbaycan Xalq Cümhuriyyəti: Müsəlman dünyasında ilk demokratik, parlamentli dünyəvi Respublika” sərlövhəli məqalələr dərc olunub.

Yazılarda Azərbaycanın müstəqillik tarixinə toxunularaq, 19-cu əsrin əvvəllərində Rusiya və İran tərəfindən bölünməsinə və dövlətçiliyindən məhrum olmasına baxmayaraq, 20-ci əsrin əvvəllərində yaranmış milli oyanış ruhu ilə azərbaycanlıların azadlıqları uğrunda mübarizə apardıqları və 1918-ci il mayın 28-də Milli Şuranın iclasında Azərbaycan Xalq Cümhuriyyətinin elan edildiyi qeyd olunub. Cümhuriyyətin Milli Konqresi tərəfindən qəbul edilən İstiqlal Bəyannaməsinin əsas müddəalarının, digər məsələlərlə yanaşı, millətlər, xüsusən qonşu dövlətlər ilə dostluq əlaqələri qurmağa, milliyyətindən, dilindən, dinindən asılı olmayaraq sərhədləri daxilində yaşayan bütün vətəndaşların siyasi hüquqlarının təmin olunmasını özündə ehtiva etdiyi vurğulanıb. Azərbaycan ərazisindəki bütün etnik qrupların inkişafı üçün geniş imkanlar yaradıldığı və eyni prinsiplərin bu gün də tətbiq edildiyi bildirilib. Məqalələrdə yeni formalaşan demokratiyanın demək olar ki, bütün sahələrdə çətinliklərlə üzləşdiyi və ölkəmizin öz əraziləri üzərində suverenliyini bərpa etmək və onu qorumaq məqsədilə Milli Ordusunun yaradıldığı diqqətə çatdırılıb.

Bununla yanaşı, köhnə məktəblərin təmiri və ya dəyişdirilməsi ilə təhsilə böyük diqqət yetirilirdiyi, eləcə də 1919-cu ildə Azərbaycan ərazisindəki ilk müasir universitet olan Bakı Dövlət Universitetinin yaradılmasının ölkənin təhsil sistemi üçün mühüm bir mərhələ olduğu qeyd olunub. Çətinliklərə və maliyyə çatışmazlıqlarına baxmayaraq, Azərbaycan tərəfindən 100 gəncin Almaniya, Fransa, İtaliya və İngiltərədəki müxtəlif təhsil müəssisələrinə təhsil almaq üçün göndərildiyi nəzərə çatdırılıb.

Məqalədə həmçinin, yeni yaranmış bu dövlətin dünyanın aparıcı ölkələri ilə diplomatik əlaqələrinin qurulduğu vurğulanıb.

 

 

Xorvatiyanın “Nacional” ictimai-siyasi jurnalında Azərbaycanın Xorvatiyadakı səfiri Fəxrəddin Qurbanovun “Azərbaycanın müstəqillik günü” sərlövhəli köşə yazısı dərc olunub.

Yazıda bildirilir: “Cari ilin 28 may tarixində dünya azərbaycanlılarının müstəqil Azərbaycan dövlətinin 103-cü ildönümünü qeyd etdikləri gündür. Koronavirus pandemiyasının hələ də bizimlə olmasına baxmayaraq, bayraqlarımız yenə də uca olacaq və millət qürur duyacaq”.

Qeyd olunub ki, bu bayramı müsbət cəhətdən fərqli edəcək başqa bir məqam isə Azərbaycanın qədim mədəniyyət paytaxtı olan Şuşanın uzun illər işğaldan sonra azad edilərək Azərbaycan xalqına qovuşmağıdır.

Daha sonra tarixə kiçik ekskurs edilərək, Azərbaycan Xalq Cümhuriyyətinin yaranma şəraiti və 23 aylıq fəaliyyəti dövründə əldə etdiyi nailiyyətlərdən, bütün sahələrdə həyata keçirilmiş islahat və quruculuq işlərindən söz açılıb. Qeyd olunub ki, cəmi 23 ay mövcud olmasına baxmayaraq, 1918-ci ilin mayından 1920-ci ilin aprelinə qədər cümhuriyyət qurucuları bəzi Qərb dövlətlərindən də öncə bir sıra müasir idealları və tədbirləri gerçəkləşdirərək gələcək nəsillərə ötürüblər.

Müəllif dövlətçiliyin əhəmiyyətindən danışmış, vətəndaşların bu müstəqilliyi onlara verənləri xatırlamalı olduqlarını vurğulayıb.

Həmçinin yazıda qeyd olunub ki, bir çox xalqlar oxşar tarixi proseslərdən keçməli olur və Azərbaycan ilə Xorvatiya buna misal olaraq həm 20-ci əsrin əvvəlində, həm də sonunda müstəqilliyi dadıb, tarixin sərt sınaqlarından üzü ağ çıxıblar.